सर्वोच्चका लागि सुविधासम्पन्न भवन बन्ने

सरकारले सर्वोच्च अदालतका लागि सुविधासम्पन्न नयाँ भवन निर्माण गर्ने भएको छ । हाल अदालत रहेको रामशाहपथस्थित भवन साँघुरो र अव्यवस्थित भएकाले नयाँ भवन बनाउन लागिएको हो । भवन निर्माणपछि सर्वोच्च अदालतलगायत न्यायपालिकासँग सम्बन्धित सबै कार्यालय एकै स्थानमा हुनेछन् ।
सिंहदरबारपरिसरमा रहेको गृहमन्त्रालय भवनको पछाडि खाली रहेको ५५ रोपनी क्षेत्रफलमा अदालतको नयाँ भवनका लागि सर्भे भइसकेको सिंहदरबार सचिवालय पुनर्निर्माण समितिका सदस्य रामप्रसाद बेलवासेले बताए ।
“अदालतको प्रवेशद्वार डिजाइनको काम पनि अन्तिम चरणमा पुगेको छ,” उनले भने, “हालको भवन ज्यादै पुरानो प्रविधि र शैलीमा बनेकाले नयाँ भवनलाई अत्याधुनिक र अन्तर्राष्ट्रिय सुविधायुक्त बनाइनेछ ।”

विस्तृत अध्ययन प्रतिवेदन (डीपीआर) तयार नभएकाले भवनको लागत भने नखुलेको उनले जनाए । “तर अन्तर्राष्ट्रिय मापदण्डअनुसारको बनाउन लागिएकाले अन्य सरकारी भवनको तुलनामा लागत बढी लाग्नेछ,” उनले भने । त्यसका लागि खुला प्रतिस्पर्धाबाट भवनको डिजाइनमा इन्जिनियरहरूलाई सहभागी गराइने बेल्वासेले बताए । उनका अनुसार अन्य सरकारी भवनलाई भन्दा विशेष प्राथमिकतामा राखेर अदालत भवन निर्माण गरिने भएको छ ।
अदालत नयाँ भवनमा सरेपछि सर्वोच्च अदालतको हालको भवनलाई सिंहदरबार सुरक्षार्थ बसेको नेपाली सेनाले प्रयोग गर्ने जनाइएको छ ।
अहिले सर्वोच्च अदालत रहेको भवन ०२४ सालअघि नै बनेको हो । अहिलेको भवनमा अदालती काम–कारबाहीका लागि समेत पर्याप्त ठाउँ छैन भने अदालतपरिसरमा सवारी पार्किङसमेतको व्यवस्था नहुँदा सेवाग्राहीलाई समस्या हुने गरेको छ । त्यस्तै, अदालतका कर्मचारीका लागि समेत हालको भवनमा पर्याप्त ठाउँ छैन । “हाल सर्वोच्च रहेको भवनमा यस्तै समस्या धेरै भएकाले अदालतका लागि नयाँ भवन बनाउन लागिएको हो,” उनले भने ।
सिंहदरबारभित्र सरकारी कार्यालयको सचिवालय भवनको व्यवस्थापनको काम सिंहदरबार सचिवालय पुनर्निर्माण समितिले गर्दै आएको छ ।
विजय देवकोटा
साभार : कारोबार दैनिक